Politidirektoratet
Politidirektoratet (POD) er underlagt Justis- og politidepartementet. Direktoratet har ansvar for fagleg leiing, styring, oppfølging og utvikling av Politi- og lensmannsetaten, irekna dei 27 politidistrikta og politiet sine særorgan, med unntak av Politiets sikkerheitsteneste.
Politidirektoratet har rundt 120 tilsette og leiast av Politidirektøren. Direktoratet held til i Oslo, der det deler bygning med Sentrum politistasjon på Arbeidersamfunnets plass.
Politidirektoratet sine hovudoppgåver er fagleg leiing, styring, oppfølging og utvikling av politidistrikta og politiet sine særorgan. Politidirektoratet er overordna makt og nærmaste støttespelar for politidistrikta og særorgana. Direktoratet har òg ein sentral rolle i innsatsen mot internasjonal og organisert kriminalitet.
Hovudoppgåver:
– samordning av måla, planane og arbeidet til politidistrikta og særorgana
– leiing av etaten
– personal- og organisasjonsutvikling
– støtte- og tilsynsoppgåver
– behandling av klagesaker
Politidirektoratet leier utviklingsarbeidet i etaten, både som styringsorgan og som kompetansesenter. Direktoratet medverkar aktivt til kriminalitetsanalyse, samordning av ressursar, metodeutvikling og leiar- og kompetanseutvikling, og kan derfor gi kvalifisert hjelp og støtte til politidistrikta, særorgana, Justis- og politidepartementet og andre samarbeidspartnarar.
Foto: Ein UEH-styrke frå øvinga Tyr i 2007. Øvinga Tyr er den årlege samverkeøvinga i regi av Politidirektoratet, der scenarioa skiftar mellom kriminalitet, naturkatastrofar og ulukker. POD har ansvar for planlegginga og gjennomføringa av desse øvingane, der vi samarbeider med andre viktige aktørar, til dømes andre naudetatar, kommunar og så vidare.
Sist oppdatert:
21.04.2009